سۈرە ھەدىد
سۈرە ھەدىد 1-ئايەت
سَبَّحَ لِلَّهِ مَا فِي السَّمَاوَاتِ وَالْأَرْضِ وَهُوَ الْعَزِيزُ الْحَكِيمُ
ئاسمانلاردىكى ۋە زېمىندىكى بارلىق نەرسىلەر ئاللاھنى ئۇلۇغلىدى. ئاللاھ مۇتلەق ئۈستۈندۇر، (ھەممىنىڭ ئۈستىدىن) ھۆكۈم يۈرگۈزگۈچىدۇر (1).
سۈرە ھەدىد 2-ئايەت
لَهُ مُلْكُ السَّمَاوَاتِ وَالْأَرْضِ يُحْيِي وَيُمِيتُ وَهُوَ عَلَى كُلِّ شَيْءٍ قَدِيرٌ
ئاسمانلارنىڭ ۋە زېمىننىڭ ئىگىلىك ھۇقۇقى ئاللاھقا تەۋەدۇر، ئۇ ھاياتلىق بەخىش ئېتىدۇ، جاننى ئالىدۇ. ئاللاھنىڭ ھەممە نەرسىگە كۈچى يەتكۈچىدۇر (2).
سۈرە ھەدىد 3-ئايەت
هُوَ الْأَوَّلُ وَالْآخِرُ وَالظَّاهِرُ وَالْبَاطِنُ وَهُوَ بِكُلِّ شَيْءٍ عَلِيمٌ
ئاللاھ ھەممە نەرسە يوق ۋاقتىدىمۇ مەۋجۇت ئىدى، ھەممە نەرسە يوقالغاندىن كېيىنمۇ مەۋجۇتتۇر، ( مەۋجۇتلۇقىنىڭ دەلىللىرى بىلەن ) ئاشكارىدۇر، ( كۆزلەرنىڭ كۆرەلىشىدىن ) مەخپىيدۇر. ئۇ ھەممە نەرسىنى ئەڭ ياخشى بىلگۈچىدۇر (3).
سۈرە ھەدىد 4-ئايەت
هُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ ثُمَّ اسْتَوَى عَلَى الْعَرْشِ يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنزِلُ مِنَ السَّمَاءِ وَمَا يَعْرُجُ فِيهَا وَهُوَ مَعَكُمْ أَيْنَ مَا كُنتُمْ وَاللَّهُ بِمَا تَعْمَلُونَ بَصِيرٌ
ئاسمانلارنى ۋە زېمىننى ئالتە كۈندە ياراتقان، ئاندىن ئەرشتە[1] ئورۇن ئالغان زات ئاللاھتۇر. ئۇ تۇپراققا كىرىدىغان، تۇپراقتىن چىقىدىغان، ئاسماندىن چۈشىدىغان ۋە ئاسمانغا كۆتۈرۈلىدىغان نەرسىلەرنى بىلىپ تۇرىدۇ. سىلەر قەيەردە بولساڭلار، ئۇ سىلەر بىلەن بىللە. ئاللاھ قىلىۋاتقان ئىش - ھەرىكىتىڭلارنى كۆرۈپ تۇرغۇچىدۇر (4).
سۈرە ھەدىد 5-ئايەت
لَّهُ مُلْكُ السَّمَاوَاتِ وَالْأَرْضِ وَإِلَى اللَّهِ تُرْجَعُ الْأُمُورُ
ئاسمانلارنىڭ ۋە زېمىننىڭ ئىگىلىك ھۇقۇقى ئاللاھقا تەۋەدۇر، (بارچە) ئىشلار ئاللاھقا قايتۇرۇلىدۇ (5).
سۈرە ھەدىد 6-ئايەت
يُولِجُ اللَّيْلَ فِي النَّهَارِ وَيُولِجُ النَّهَارَ فِي اللَّيْلِ وَهُوَ عَلِيمٌ بِذَاتِ الصُّدُورِ
ئاللاھ كۈندۈزنى قىسقارتىپ كېچىنى ئۇزارتىدۇ ، كېچىنى قىسقارتىپ كۈندۈزنى ئۇزارتىدۇ، ئۇ دىللاردىكى سىرلارنى بىلگۈچىدۇر (6).
سۈرە ھەدىد 7-ئايەت
آمِنُوا بِاللَّهِ وَرَسُولِهِ وَأَنفِقُوا مِمَّا جَعَلَكُم مُّسْتَخْلَفِينَ فِيهِ فَالَّذِينَ آمَنُوا مِنكُمْ وَأَنفَقُوا لَهُمْ أَجْرٌ كَبِيرٌ
ئاللاھقا ۋە ئۇنىڭ رەسۇلىغا ئىمان ئېيتىڭلار، ئاللاھ سىلەرنى ئامانەتچى قىلغان پۇل - مالدىن خەير-ساخاۋەت قىلىڭلار . سىلەردىن ئىمان ئېيتقان ۋە خەير-ساخاۋەت قىلغانلار كاتتا ساۋابقا ئېرىشىدۇ (7).
سۈرە ھەدىد 8-ئايەت
وَمَا لَكُمْ لَا تُؤْمِنُونَ بِاللَّهِ وَالرَّسُولُ يَدْعُوكُمْ لِتُؤْمِنُوا بِرَبِّكُمْ وَقَدْ أَخَذَ مِيثَاقَكُمْ إِن كُنتُم مُّؤْمِنِينَ
رەسۇل سىلەرنى رەببىڭلار(ئاللاھ)غا ئىشىنىشكە چاقىرىۋاتقان تۇرسا، سىلەر نېمىشقا ئاللاھقا ئىشەنمەيسىلەر؟ ئەگەر ئىشىنىدىغانلار بولساڭلار، ئاللاھ سىلەردىن چىن ئەھدە ئالغان (8).
سۈرە ھەدىد 9-ئايەت
هُوَ الَّذِي يُنَزِّلُ عَلَى عَبْدِهِ آيَاتٍ بَيِّنَاتٍ لِّيُخْرِجَكُم مِّنَ الظُّلُمَاتِ إِلَى النُّورِ وَإِنَّ اللَّهَ بِكُمْ لَرَءُوفٌ رَّحِيمٌ
سىلەرنى قاراڭغۇلۇقتىن يورۇقلۇققا چىقىرىش ئۈچۈن، بەندىسى (مۇھەممەت) كە رۇشەن ئايەتلەرنى چۈشۈرگەن زات ئاللاھتۇر. ئاللاھ سىلەرگە تولىمۇ كۆيۈمچان ۋە ناھايىتى رەھىمدىلدۇر (9).
سۈرە ھەدىد 10-ئايەت
وَمَا لَكُمْ أَلَّا تُنفِقُوا فِي سَبِيلِ اللَّهِ وَلِلَّهِ مِيرَاثُ السَّمَاوَاتِ وَالْأَرْضِ لَا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ أُولَئِكَ أَعْظَمُ دَرَجَةً مِّنَ الَّذِينَ أَنفَقُوا مِن بَعْدُ وَقَاتَلُوا وَكُلًّا وَعَدَ اللَّهُ الْحُسْنَى وَاللَّهُ بِمَا تَعْمَلُونَ خَبِيرٌ
ئاسمانلارنىڭ ۋە زېمىننىڭ مىراسى ئاللاھقا تەۋە تۇرسا، سىلەر نېمىشقا ئاللاھنىڭ يولىدا خەير-ساخاۋەت قىلمايسىلەر؟ سىلەرنىڭ ئاراڭلاردىن (مەككىنىڭ) پەتھىسىدىن ئىلگىرى خەير-ساخاۋەت قىلغان ۋە (رەسۇلۇللاھ بىلەن بىر سەپتە تۇرۇپ) ئۇرۇش قىلغانلار بىلەن ( مەككىنىڭ پەتھىسىدىن كېيىن خەير-ساخاۋەت قىلىپ ئۇرۇشقا قاتناشقانلار ئوخشاش دەرىجىدە تۇرمايدۇ )، ئەنە شۇلار دەرىجە جەھەتتىن كېيىنچە خەير-ساخاۋەت قىلغان ۋە ئۇرۇشقا قاتناشقانلاردىن يوقۇرى ئورۇندا تۇرىدۇ. ئاللاھ (ئۇلارنىڭ) ھەربىرىگە (جەننەتتىن ئىبارەت) ئەڭ ياخشىسىنى ۋەدە قىلدى . ئاللاھ سىلەرنىڭ قىلىۋاتقان ئىش-ھەرىكىتىڭلاردىن خەۋەرداردۇر (10).
سۈرە ھەدىد 11-ئايەت
مَّن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ وَلَهُ أَجْرٌ كَرِيمٌ
كىمكى (خەير-ساخاۋەت قىلىش ئارقىلىق) ئاللاھقا ياخشى قەرز بېرىدىكەن، ئاللاھ ئۇ كىشىگە ئۇنى ھەسسىلەپ قايتۇرىدۇ، ئۇ ئېسىل مۇكاپاتقا سازاۋەر بولىدۇ (11).
سۈرە ھەدىد 12-ئايەت
يَوْمَ تَرَى الْمُؤْمِنِينَ وَالْمُؤْمِنَاتِ يَسْعَى نُورُهُم بَيْنَ أَيْدِيهِمْ وَبِأَيْمَانِهِم بُشْرَاكُمُ الْيَوْمَ جَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا ذَلِكَ هُوَ الْفَوْزُ الْعَظِيمُ
ئۇ (قىيامەت) كۈنى ئىمانلىق ئەرلەرنى، ئىمانلىق ئاياللارنى ئۇلارنىڭ ئالدىدا ۋە ئوڭ تەرىپىدە نۇرى چاقناۋاتقان ھالدا كۆرىسەن. (ئۇلارغا): «بۈگۈن سىلەرگە ئاستىدىن ئۆستەڭلەر ئېقىپ تۇرىدىغان جەننەتلەر بىلەن خۇش-خەۋەر بار، ئۇ يەرلەردە مەڭگۈ قالىسىلەر» ( دېيىلىدۇ )، ئەنە شۇ زور ئۇتۇقنىڭ دەل ئۆزىدۇر (12).
سۈرە ھەدىد 13-ئايەت
يَوْمَ يَقُولُ الْمُنَافِقُونَ وَالْمُنَافِقَاتُ لِلَّذِينَ آمَنُوا انظُرُونَا نَقْتَبِسْ مِن نُّورِكُمْ قِيلَ ارْجِعُوا وَرَاءَكُمْ فَالْتَمِسُوا نُورًا فَضُرِبَ بَيْنَهُم بِسُورٍ لَّهُ بَابٌ بَاطِنُهُ فِيهِ الرَّحْمَةُ وَظَاهِرُهُ مِن قِبَلِهِ الْعَذَابُ
ئۇ (قىيامەت) كۈنى ئىككى يۈزلىمىچى-مۇناپىق ئەرلەر، ئىككى يۈزلىمىچى-مۇناپىق ئاياللار مۆمىنلەرگە: «بىزگە قاراپ قويۇڭلار، سىلەرنىڭ نۇرۇڭلاردىن ئازراق نەپ ئېلىۋالايلى» دەيدۇ. ئۇلارغا: «ئارقاڭلارغا قايتىپ نۇر ئىزدەپ بېقىڭلار» دېيىلىدۇ. شۇنىڭ بىلەن ئۇلارنىڭ ئارىسىغا بىر سېپىل سوقۇلىدۇ، سېپىلنىڭ دەرۋازىسى بولىدۇ، دەرۋازىنىڭ ئىچى تەرىپىدە مېھىر-شەپقەت، تېشىدا ئازاب-ئوقۇبەت بولىدۇ (13).
سۈرە ھەدىد 14-ئايەت
يُنَادُونَهُمْ أَلَمْ نَكُن مَّعَكُمْ قَالُوا بَلَى وَلَكِنَّكُمْ فَتَنتُمْ أَنفُسَكُمْ وَتَرَبَّصْتُمْ وَارْتَبْتُمْ وَغَرَّتْكُمُ الْأَمَانِيُّ حَتَّى جَاءَ أَمْرُ اللَّهِ وَغَرَّكُم بِاللَّهِ الْغَرُورُ
ئۇ (ئىككى يۈزلىمىچى-مۇناپىق) لار مۆمىنلەرگە: «بىز سىلەر بىلەن بىللە ئەمەسمىدۇق؟» دەپ توۋلايدۇ. مۆمىنلەر: «شۇنداق، بىراق سىلەر بىر-بىرىڭلارنى پىتنىگە سۆرىدىڭلار، (مۆمىنلەرگە بالايى-ئاپەتنىڭ كېلىشىنى) كۈتتۈڭلار، (ئىسلامغا) گۇمان بىلەن قارىدىڭلار، قۇرۇق ئارزۇلار سىلەرنى ئالدىدى، ئاخىر سىلەرگە ئاللاھنىڭ (ئۆلۈم) پەرمانى كەلدى. ئالدامچى سىلەرنى ئاللاھ (نى قالقان قىلىپ تورۇپ) ئالدىدى» دەيدۇ (14).
سۈرە ھەدىد 15-ئايەت
فَالْيَوْمَ لَا يُؤْخَذُ مِنكُمْ فِدْيَةٌ وَلَا مِنَ الَّذِينَ كَفَرُوا مَأْوَاكُمُ النَّارُ هِيَ مَوْلَاكُمْ وَبِئْسَ الْمَصِيرُ
(ئىككى يۈزلىمىچى-مۇناپىقلارغا): «بۈگۈن سىلەردىنمۇ، كاپىرلاردىنمۇ (ئازاب-ئوقۇبەتتىن قۇتۇلۇپ قېلىش ئۈچۈن) فىديە قۇبۇل قىلىنمايدۇ، سىلەرنىڭ بارىدىغان جايىڭلار دوزاختۇر، دوزاخ سىلەرنىڭ جانىجان دوستۇڭلاردۇر، دوزاخ نېمىدىگەن يامان جاي! (دېيىلىدۇ) (15).
سۈرە ھەدىد 16-ئايەت
أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ
ئىمان ئېيتقانلار ئۈچۈن ئاللاھنىڭ زىكرىگە ۋە نازىل بولغان ھەقىقەت (يەنى قۇرئان ئايەتلىرى) گە دىللىرى يۇمشايدىغان ۋاقىت تېخى يېتىپ كەلمىدىمۇ؟ ئۇلار ئىلگىرى كىتاب بېرىلگەنلەردەك بولمىسۇن. زاماننىڭ ئۇزىرىشى بىلەن ئۇلارنىڭ دىللىرى قېتىپ كەتكەن ئىدى، ئۇلارنىڭ كۆپىنچىسى ئاللاھنىڭ ئىتائىتىدىن چىققۇچىلاردۇر (16).
سۈرە ھەدىد 17-ئايەت
اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ
بىلىڭلاركى، ئاللاھ زېمىنغا ئۆلۈمدىن كېيىن (يامغۇر ئارقىلىق كۆكەرتىپ) جان ئاتا قىلىدۇ. «ئەقلىڭلارنى ئىشلەتكەيسىلەر» دەپ سىلەرگە (قۇدرىتىمىزنى كۆرسىتىدىغان) دەلىللەرنى بايان قىلدۇق (17).
سۈرە ھەدىد 18-ئايەت
إِنَّ الْمُصَّدِّقِينَ وَالْمُصَّدِّقَاتِ وَأَقْرَضُوا اللَّهَ قَرْضًا حَسَنًا يُضَاعَفُ لَهُمْ وَلَهُمْ أَجْرٌ كَرِيمٌ
(سەدىقە بېرىش ئارقىلىق ئىمانىغا بولغان) ساداقىتىنىڭ بەدىلىنى تۆلىگەن ئەرلەر ۋە ئاياللار بىلەن (ياخشىلىق يوللىرىغا خۇشاللىق بىلەن پۇل ـ مال سەرپ قىلىش ئارقىلىق) ئاللاھقا ياخشى قەرز بەرگۈچىلەرگە ھەسسىلەپ (ساۋاب) بېرىلىدۇ، ئۇلارغا كاتتا مۇكاپات بار (18).
سۈرە ھەدىد 19-ئايەت
وَالَّذِينَ آمَنُوا بِاللَّهِ وَرُسُلِهِ أُولَئِكَ هُمُ الصِّدِّيقُونَ وَالشُّهَدَاءُ عِندَ رَبِّهِمْ لَهُمْ أَجْرُهُمْ وَنُورُهُمْ وَالَّذِينَ كَفَرُوا وَكَذَّبُوا بِآيَاتِنَا أُولَئِكَ أَصْحَابُ الْجَحِيمِ
ئاللاھقا ۋە ئۇنىڭ ئەلچىلىرىگە ئىشەنگەنلەرگە كەلسەك، ئەنە شۇلار رەببىنىڭ نەزىرىدە راستچىللاردۇر ۋە شېھىتلاردۇر. ئۇلار (ئاخىرەتتە) مۇكاپاتقا ۋە نۇرغا سازاۋەر بولىدۇ. كاپىر بولغان ۋە ئايەتلىرىمىزنى يالغانغا چىقارغانلارغا كەلسەك – ئەنە شۇلار دوزىخىيلاردۇر (19).
سۈرە ھەدىد 20-ئايەت
اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ وَمَا الْحَيَاةُ الدُّنْيَا إِلَّا مَتَاعُ الْغُرُورِ
بىلىڭلاركى، بۇ دۇنيا ھاياتى ئويۇن-تاماشادىن، زىبۇ-زىننەتتىن، ئۆز-ئارا پەخىرلىنىشتىن، پۇل-مال ۋە بالا-چاقا ئاۋۇتۇش مۇسابىقىسىدىن ئىبارەتتۇر. ئۇ يامغۇر يېغىش بىلەن ئۆسۈپ دېھقانلارنى خۇرسەن قىلغان ئۆسۈملۈككە ئوخشايدۇ، ئاندىن ئۇ ئۆسۈملۈك قورۇپ قالىدۇ - دە، سەن ئۇنىڭ سارغىيىپ قالغانلىقىنى كۆرىسەن، ئاندىن ئۇ قۇرۇق ئوت-چۆپكە ئايلىنىدۇ. ئاخىرەتتە قاتتىق ئازاب-ئوقۇبەت، ئاللاھنىڭ ئەپۇ-مەغپىرىتى ۋە رازىمەنلىكى بار. دۇنيا ھاياتى (ئاخىرەتكە سېلىشتۇرغاندا) ئالدىنىپ بەھرىمەن بولىدىغان تىرىكچىلىكتىن باشقا نەرسە ئەمەس (20).
سۈرە ھەدىد 21-ئايەت
سَابِقُوا إِلَى مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ذَلِكَ فَضْلُ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ
رەببىڭلارنىڭ ئەپۇ – مەغپىرىتىنى، كەڭلىكى ئاسمانلارنىڭ ۋە زېمىننىڭ كەڭلىكىدەك كېلىدىغان جەننەتنى قوغلىشىڭلار. جەننەت ئاللاھ ۋە ئاللاھنىڭ ئەلچىلىرىگە ئىشەنگەنلەر ئۈچۈن تەييارلاندى. بۇ جەننەت ئاللاھنىڭ خالىغان كىشىگە ئاتا قىلىدىغان پەزل-ئىلتىپاتىدۇر. ئاللاھ زور پەزل-ئىلتىپات ئىگىسىدۇر (21).
سۈرە ھەدىد 22-ئايەت
مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا إِنَّ ذَلِكَ عَلَى اللَّهِ يَسِيرٌ
يەر يۈزىدە يۈز بەرگەن ۋە ئۆزۈڭلار ئۇچرىغان ھەرقانداق بىرەر ھادىسە بولىدىكەن، يارىتىشتىن بۇرۇنلا ئۇنىڭ (قانۇنىيىتى) بىر پۈتۈكتە بار ئىدى[2]. بۇ شۈبھىسىزكى، ئاللاھقا ئاساندۇر (22).
سۈرە ھەدىد 23-ئايەت
لِّكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آتَاكُمْ وَاللَّهُ لَا يُحِبُّ كُلَّ مُخْتَالٍ فَخُورٍ
بۇ قولۇڭلاردىن كەتكەن نەرسىگە قايغۇرۇپ كەتمەسلىكىڭلار ۋە ئاللاھ بەخىش ئەتكەن نېمەتلەر ئارقىلىق كۆرەڭلەپ كەتمەسلىكىڭلار ئۈچۈندۇر. ئاللاھ ھەرقانداق ھاكاۋۇر، ماختانچاق ئادەمنى ياقتۇرمايدۇ (23).
سۈرە ھەدىد 24-ئايەت
الَّذِينَ يَبْخَلُونَ وَيَأْمُرُونَ النَّاسَ بِالْبُخْلِ وَمَن يَتَوَلَّ فَإِنَّ اللَّهَ هُوَ الْغَنِيُّ الْحَمِيدُ
ئۇلار پىخسىقلىق قىلىدىغان ۋە كىشلەرنى پىخسىقلىققا ئۈندەيدىغانلاردۇر. كىمكى (خەير-ساخاۋەت قىلىشتىن) يۈز ئۆرۈيدىكەن ئاللاھ بىھاجەتتۇر، مەدھىيىگە لايىقتۇر (24).
سۈرە ھەدىد 25-ئايەت
لَقَدْ أَرْسَلْنَا رُسُلَنَا بِالْبَيِّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ وَأَنزَلْنَا الْحَدِيدَ فِيهِ بَأْسٌ شَدِيدٌ وَمَنَافِعُ لِلنَّاسِ وَلِيَعْلَمَ اللَّهُ مَن يَنصُرُهُ وَرُسُلَهُ بِالْغَيْبِ إِنَّ اللَّهَ قَوِيٌّ عَزِيزٌ
بىز ھەقىقەتەن ئەلچىلىرىمىزنى (ھەقىقەتنىڭ) ئېنىق پاكىتلىرى بىلەن ئەۋەتتۇق. ئىنسانلار ئادالەتنى تىكلىسۇن دەپ ئەلچىلەر بىلەن بىللە كىتابنى ۋە تەۋراتنى چۈشۈردۇق. بىز كۈچ - قۇۋۋەتنى ئۆز ئىچىگە ئالغان ۋە ئىنسانلار ئۈچۈن نۇرغۇن مەنپەئەتلەر بولغان تۆمۈرنى چۈشۈردۇق[3]. بۇ ئاللاھنىڭ ئاللاھنى كۆرمەي تۇرۇپ ئاللاھقا ۋە ئەلچىلىرىگە ھەمدەمدە بولغانلارنى پەرقلەندۈرۈشى ئۈچۈندۇر. ئاللاھ ھەقىقەتەن كۈچ - قۇدرەتلىكتۇر، مۇتلەق ئۈستۈندۇر (25).
سۈرە ھەدىد 26-ئايەت
وَلَقَدْ أَرْسَلْنَا نُوحًا وَإِبْرَاهِيمَ وَجَعَلْنَا فِي ذُرِّيَّتِهِمَا النُّبُوَّةَ وَالْكِتَابَ فَمِنْهُم مُّهْتَدٍ وَكَثِيرٌ مِّنْهُمْ فَاسِقُونَ
شۈبھىسىزكى بىز نوھنى، ئىبراھىمنى ئەلچى قىلىپ ئەۋەتكەن ئىدۇق، ئۇ ئىككىسىنىڭ ئۇرۇق-ئەۋلادىغا نۇبۇۋۋەت ۋە كىتاب بەرگەن ئىدۇق. ئۇلارنىڭ ئىچىدىن توغرا يولدا ماڭغانلار بار، ئۇلارنىڭ ئارىسىدىن كۆپىنچىسى پاسىق _ ئاللاھنىڭ ئىتائىتىدىن چىققۇچىلاردۇر (26).
سۈرە ھەدىد 27-ئايەت
ثُمَّ قَفَّيْنَا عَلَى آثَارِهِم بِرُسُلِنَا وَقَفَّيْنَا بِعِيسَى ابْنِ مَرْيَمَ وَآتَيْنَاهُ الْإِنجِيلَ وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاءَ رِضْوَانِ اللَّهِ فَمَا رَعَوْهَا حَقَّ رِعَايَتِهَا فَآتَيْنَا الَّذِينَ آمَنُوا مِنْهُمْ أَجْرَهُمْ وَكَثِيرٌ مِّنْهُمْ فَاسِقُونَ
ئاندىن كېيىن ئەلچىلىرىمىزنى ئارقا - ئارقىدىن ئەۋەتتۇق، ئارقىدىن مەريەم ئوغلى ئىسانى ئەۋەتتۇق، ئۇنىڭغا ئىنجىلنى ئاتا قىلدۇق، ئۇنىڭغا ئەگەشكەنلەرنىڭ دىللىرىغا شەپقەت ۋە مېھرىبانلىق تۇيغۇسى سالدۇق، بىدئەت سۈپىتىدە پەيدا قىلىۋېلىشقان روھبانلىقنى ئۇلارغا بىز بېكىتمىگەن ئىدۇق، ئۇلار ئۇنى پەقەت ئاللاھنىڭ خۇرسەنلىكىگە ئېرىشىشنى كۆزلەپ پەيدا قىلىۋېلىشتى، لېكىن ئۇنىڭغىمۇ لايىق دەرىجىدە رىئايە قىلمىدى. ئۇلاردىن ئىمان ئېيتقانلارنىڭ ئەجرىنى بەردۇق، ئۇلارنىڭ تولىسى پاسىق-ئاللاھنىڭ ئىتائىتىدىن چىققۇچىلاردۇر (27).
سۈرە ھەدىد 28-ئايەت
يَا أَيُّهَا الَّذِينَ آمَنُوا اتَّقُوا اللَّهَ وَآمِنُوا بِرَسُولِهِ يُؤْتِكُمْ كِفْلَيْنِ مِن رَّحْمَتِهِ وَيَجْعَل لَّكُمْ نُورًا تَمْشُونَ بِهِ وَيَغْفِرْ لَكُمْ وَاللَّهُ غَفُورٌ رَّحِيمٌ
ئى (تەۋھىتكە) ئىمان ئېيتقان (ئەھلى كىتاب)لار![4] ئاللاھقا تەقۋادار-مەسئۇلىيەتچان بولۇڭلار ۋە ئۇنىڭ رەسۇلى (يەنى مۇھەممەت) كە ئىمان كەلتۈرۈڭلار، ئاللاھ سىلەرگە مېھىر-شەپقىتىدىن ئىككى ھەسسە ئاتا قىلىدۇ، سىلەرگە سىلەر يورۇقىدا ماڭىدىغان نۇرنى بەخىش ئېتىدۇ ۋە سىلەر (نىڭ ئۆتمۈشتىكى گۇناھىڭلار) نى كەچۈرىدۇ. ئاللاھ ئىنتايىن كەچۈرۈمچان، تولىمۇ رەھىمدىلدۇر (28).
سۈرە ھەدىد 29-ئايەت
لِّئَلَّا يَعْلَمَ أَهْلُ الْكِتَابِ أَلَّا يَقْدِرُونَ عَلَى شَيْءٍ مِّن فَضْلِ اللَّهِ وَأَنَّ الْفَضْلَ بِيَدِ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ
بۇ ئەھلى كىتاب بىلمەمدۇكى، ئۇلار ئاللاھنىڭ پەزل - ئىلتىپاتىغا قىلچىلىكمۇ ئىگە بولالمايدۇ، بارچە پەزل-ئىلتىپات ئاللاھنىڭ ئىلكىدە بولۇپ ئۇنى خالىغان كىشىگە بېرىدۇ. ئاللاھ كاتتا پەزل - ئىلتىپات ئىگىسىدۇر (29).
Flag Counter